A cewar rahoton Kamfanin Dillancin Labaran Hauza, a cikin wata sanarwa da Rundunar IRGC ta fitar, an bayyana cewa harin da aka kai kan wani gida a Sirik ya jikkata mutane da dama tare da haddasa mutuwar wasu daga cikinsu, ciki har da wani yaro. Rundunar ta bayyana harin a matsayin wani aiki da ya nuna ƙiyayyar Amurka ga al'ummar Iran.
Sanarwar ta ce, a matsayin martani ga wannan hari, dakarun rundunar kula da sararin samaniya ta IRGC sun gudanar da kashi na biyu na wani samame mai taken “Operation Punishment of the Aggressor”, inda suka yi amfani da makamai masu linzami masu cin dogon zango wajen kai hari kan wata sansanin sojojin Amurka a Jordan, da ake kira Camp Titetin, da ke kusa da gabar Tekun Aqaba.
A cewar sanarwar, hare-haren sun lalata wasu muhimman cibiyoyi da kuma wasu jirage masu saukar ungulu na sojojin Amurka. Rundunar ta kuma yi iƙirarin cewa hare-haren sun yi sanadin mutuwar wasu daga cikin sojojin Amurkan, ba tare da bayyana adadin mutanen da abin ya shafa ba.
A wani sashe na sanarwar, IRGC ta kuma bayyana cewa dakarunta sun kai hare-haren makamai masu linzami da jirage marasa matuƙa kan wani sansanin Amurka da ke Ali Al Salem a Kuwait, wanda ta ce ana amfani da shi wajen gudanar da ayyukan soji.
Sanarwar ta ce an kai hari kan wurin da ake zama da kuma hedikwatar kwamandan Amurka na sansanin, sannan aka kai hari kan wuraren ajiye jirage marasa matuƙa da kuma filin da ake shirya jiragen marasa matuƙan da ake amfani da su wajen kai hare-hare.
A cewar Rundunar IRGC, an lalata wasu jirage marasa matuƙa tare da kashe wasu daga cikin sojojin dakarun Amurka.
Rundunar ta jaddada cewa waɗannan hare-haren sun kasance martani ne ga harin da sojojin Amurka suka kai kan fararen hula a Sirik, tana mai cewa tana adawa da kasancewar sojojin Amurka a ƙasashen yankin.
A ƙarshen sanarwar, IRGC ta bayyana cewa ayyukan ta na ramuwar gayya za su ci gaba.
Ra'ayinka